ASKOFU HOMA BAY ATOWEKA BAADA YA KUCHOMA FUVU LA BINADAMU KATIKA MAOMBI YA MKESHA WA PASAKA.

 

Askofu Charles Ododo kutoka eneo bunge la Mbita Kaunti ya Homa Bay ameingia mafichoni baada kuchoma fuvu la kichwa la binadamu katika maombi yake ya mkesha wa siku kuu ya pasaka.

Kulingana na askofu huyo ni kuwa alielezwa na Mungu kuwa angelipata fuvu la kichwa ya mwanadamu katika ufuo wa Ziwa.

Ododo anasemekana kuwaeleza wafuasi wake mkesha wa usiku wa pasaka kuwa alikuwa amepata maono kutoka kwa Mungu kuwa angepata fuvu la kichwa cha binadamu ndani ya maji.

Taarifa ya polisi  imeeleza kuwa Ododo alikuwa amepata mwaliko kuhubiri katika kanisa lililoko  eneo la Gembe Magharibi siku ya Jumamosi na kuwa wakati wa maombi katika kanisa hilo ndipo Askofu huyo alidai kupokea maono kutoka kwa Mungu.

Wafuasi wa Ododo wanasemekana kumuamini askofu huyo na kumfuata katika fuo la Ziwa ambako walipata fuvu la kichwa cha mwanadamu na kisha wakaiteketeza.

Kulingana na Naibu Chifu wa Lokesheni Ndogo ya Kasgunga Mashariki Francis Kasuku suala hilo lilijulikana baada ya wakazi kuanza kusambaza habari hizo kwenye mitandao ya kijamii.

Kasuku anasemekana kuripoti kisa hicho kwa maafisa wa polisi ambao aliwataka wamhoji askofu huyo na wafuasi wake kuhusu hatua yao ya kuchoma fuvu la kichwa cha mwanadamu.

Imesemekana kuwa polisi walipofika kumhoji mshukiwa tayari alikuwa ashatoweka na kuwa wafuasi wake waliohojiwa walisema kuwa ni yeye alikuwa mhusika mkuu katika tukio hilo.

Tupe maoni yako