MPANGO ASIMULIA ALIVYOISHI NA DR. FAUSTINE NDUNGULILE.

 

MAKAMU wa Rais Dk Philip Mpango amesema marehemu Dk Faustine Ndugulile alikua kiongozi mwenye nidhamu, rafiki wa kila mtu na kiongozi aliyeweza kutetea vema maslahi ya Taifa.

Makamu wa Rais amesema hayo leo Novemba 30 alipofika nyumbani kwa aliyekuwa Mbunge wa Kigamboni na Mkurugenzi Mteule wa Shirika la Afya Duniani (WHO) Kanda ya Afrika Dk Faustine Ndugulile Kigamboni jijini Dar es Salaam kwa lengo la kuifariji familia pamoja na waombolezaji wote.

Makamu wa Rais amewaombea faraja na moyo wa uvumilivu wote walioguswa na msiba huo.

Amewashukuru wote walioshiriki katika kuifariji familia wakati huu wa kipindi kigumu kwao na kutoa wito kwa Watanzania kuendelea kushirikiana katika nyakati mbalimbali zinazojitokeza katika jamii ikiwemo za majozi na furaha.

Aidha amesema inapaswa kuendelea kumshukuru Mungu kwa maisha ya Dk Ndugulile hapa duniani. Ameongeza kwamba ni vema kwa Watanzania kuendelea kuishi vizuri na ndugu na majirani.

Akiwa nyumbani hapo, Makamu wa Rais amesali pamoja na familia, ndugu, jamaa na marafiki kumuombea marehemu Dk Faustine Ndugulile.

UJENZI WA UWANJA WA AFCON ARUSHA WAFIKIA 11%

 NA ALBERT G.SENGO

Katibu Mkuu wa Wizara ya Utamaduni, Sanaa na Michezo Gerson Msigwa amesema anaridhishwa na maendeleo ya ujenzi wa Uwanja wa Michezo wa Arusha unaotarajiwa kutumika kwa ajili ya Fainali za AFCON 2027 ambao hadi sasa umefikia 11% za ujenzi. Msigwa amesema hayo wakati alipotembelea na kukagua maendeleo ya Mradi wa ujenzi wa uwanja huo unaojengwa katika kata ya Olmoti jijini Arusha kwa saa 24 usiku na mchana. Aidha, Msigwa mesema pamoja na kuridhishwa na maendeleo ya ujenzi wa uwanja huo, hata hivyo amemtahadharisha mkandarasi huyo kuwa siku atakapochelewesha kazi ya ujenzi wa uwanja huo ndipo ugomvi wake na mkandarasi huyo utakapo kuja hata kabla Waziri wa Wizara yake Mhe. Dkt. Damas Ndumbaro hajaja. Msigwa amemshukuru Rais wa Jamhuri ya Muungano wa Tanzania Mhe. Dkt. Samia Suluhu Hassan kwa kutoa fedha za ujenzi wa Uwanja huo wa Michezo wa Arusha unaotarajiwa kutumika kwa ajili ya Fainali za AFCON 2027 ambapo fedha za ujenzi wa Uwanja huo zimekuwa zikija kwa wakati kutoka Wizara ya Fedha.

WITO KWA VIJANA KUCHUKUA HATUA MADHUBUTI KUJUA AFYA ZAO NA KUISHI KWA TAHADHARI DHIDI YA MAAMBUKIZI YA VVU

Na.MWANDISHI WETU - RUVUMA

Naibu Waziri Ofisi ya Waziri Mkuu anayeshughulikia masuala ya Sera, Bunge, na Uratibu Mheshimiwa Ummy Nderiananga ametoa wito kwa vijana nchini kuchukua hatua madhubuti katika kujua hali zao za maambukizi ya Virusi vya UKIMWI (VVU).

Ametoa wito huo tarehe 30 Novemba, 2024, wakati akihitimisha wiki ya vijana katika uwanja wa Majimaji Mkoani Ruvuma katika kuelekea Maadhimisho ya Siku ya UKIMWI Duniani yanayofanyika kitaifa Mkoani Ruvuma.

Katika hotuba yake, Naibu Waziri Mhe. Nderiananga  amebainisha kwamba, changamoto kubwa inayowakumba vijana ni ukosefu wa mwamko wa kupima afya zao, na kutokujua hali zao za maambukizi.

Amesisitiza kuwa Serikali ya Jamhuri ya Muungano wa Tanzania, inayoongozwa na Rais Dkt. Samia Suluhu Hassan, imejipanga kikamilifu kuendelea kuwaunga mkono vijana katika mapambano dhidi ya maambukizi ya VVU.

Akiwahimiza vijana kuendeleza mshikamano na juhudi za pamoja, Naibu Waziri amesema, ifikapo mwaka 2025, Wamelenga kuvuka malengo katika kupambana na janga la UKIMWI. 

Aidha amesema ni muhimu kwa kila kijana kushiriki kikamilifu katika kupima afya, kujikinga na kuelimishana kuhusu athari za VVU.

Pamoja na hayo Mhe. Nderiananga amewataka vijana kushirikiana na Serikali, Mashirika ya Kiraia, na wadau mbalimbali kuhakikisha elimu kuhusu VVU na UKIMWI inafikia maeneo yote, hasa vijijini, ambako changamoto ya uelewa bado ni kubwa.

Haya yote yanafanyika ikiwa ni kuelekea Kilele cha Maadhimisho ya siku ya UKIMWI Duniani ambapo huazimishwa kila Disemba Mosi ya mwaka, ambapo mwaka huu Kitaifa yanaadhimishwa Mkoani Ruvuma, yenye kauli mbiu isemayo: "Chagua njia sahihi, tokomeza UKIMWI"

MGODI WA BARRICK NORTH MARA WASHINDA TUZO KUBWA ZA MWAJIRI BORA 2024

Naibu Waziri Mkuu Mkuu na Waziri wa Nishati, Dkt. Dotto Biteko akitoa pongezi kwa Meneja Uhusiano wa Barrick, Georgia Mutagahywa kwa ushindi wa North Mara baada ya kumkabidhi. Waziri wa Nchi Ofisi ya Waziri Mkuu (Kazi, Vijana, Ajira na Wenye Ulemavu), Mhe. Ridhiwani Kikwete (kushoto) akimkabidhi tuzo ya Mwajiri bora Mwenyekiti wa Chama cha Wafanyakazi mgodi wa North Mara, Michael Kahela (kulia).


Wafanyakazi wa Barrick wakisherekea tuzo 6 za ushindi

Na Mwandishi Wetu.

Mgodi wa North North Mara uliopo wilayani Tarime mkoani Mara ambao unamilikiwa kwa ubia na kampuni ya Barrick na serikali ya Tanzania kupitia kampuni ya Twiga minerals kwa mara nyingine baada ya ushindi wa mwaka jana umeshinda tena tuzo kubwa ya jumla ya mwajiri bora inayotolewa na Chama cha Waajiri Tanzania (ATE).

Tuzo nyingine ambazo mgodi huo umeshinda ni Uwajibikaji kwa Jamii, Afya na Usalama Mahali pa kazi, Mshindi wa pili katika kipengele cha Mwajiri Bora sekta binafsi, na uzingatiaji wa kanuni za Maudhui ya ndani .Mgodi wa Barrick Bulyanhulu nao umeshinda katika kipengele cha uzingatiaji wa sheria na kanuni kutoka Mamlaka za usimamizi.

Hafla ya kukabidhi tuzo hizo ilifanyika katika hoteli ya Serena jijini Dar es Salaam ambapo Mgeni rasmi alikuwa ni Naibu Waziri Mkuu Mkuu na Waziri wa Nishati, Dkt. Dotto Biteko.

Akiongelea mafanikio haya ya mgodi wa North Mara, Meneja Uhusiano wa Barrick, Georgia Mutagahywa, alisema ushindi wa tuzo hizi unadhihirisha mgodi huo unavyoendeshwa kwa weredi na viwango vya kimataifa ukitoa kipaumbele kikubwa katika suala la uzingatiaji afya na usalama sambamba na ukuzaji wa vipaji vya Watanzania, Migodi yote ya Barrick inaongozwa na Watanzania na asilimia 96% ya wafanyakazi ni wazawa. Pia kampuni Imekuwa na mpango wa kuwezesha wafanyakazi Wanawake ambapo kwa sasa wanafanya kazi kwa ufanisi katika vitengo mbalimbali.

“Suala la kudumisha uhusiano mzuri na Wafanyakazi linapewa umuhimu mkubwa sambamba na kuendesha programu za kuwajengea afya nje kwa kushiriki mazoezi na michezo mbalimbali.

Migodi ya Barrick na Twiga pia imekuwa mstari wa mbele kuunga mkono jitihada za Serikali kutekeleza miradi ya kuleta mabadiliko chanya katika jamii za maeneo yanayozunguka migodi yake hususani katika sekta za elimu, Afya, Maji safi na salama na ujenzi wa miundombinu ya barabara.Kati ya mwaka 2020 hadi 2024 Barrick North Mara imewekeza zaidi ya shilingi bilioni 22 katika kutekeleza miradi 253 ya kijamii.

VYAMA VYA SIASA WILAYA YA TANGA VYAPONGEZA MCHAKATO WA UCHAGUZI WA SERIKALI ZA MITAA.

 

Na Oscar Assenga,TANGA

Vyama vya Siasa vilivyoshiriki Uchaguzi wa Serikali za mitaa wa Novemba 27 mwaka huu katika Halmashauri ya Jiji la Tanga, vimetoa tamko la pamoja na kupongeza mchakato wa Uchaguzi huo huku vikitaka dosari chache zilizojitokeza zifanyiwe kazi na Tamisemi.

Vyama hivyo ni pamoja na Chama cha Mapinduzi (CCM),Chama Demokrasia na Maendeleo (CHADEMA) ,vyama vyengine ni (ACT-Wazalendo) CUF, ADC,TLP na NCCR-Mageuzi.


Vyama hivyo vimetoa tamko la pamoja leo Novemba 29 mara baada ya matokeo ya jumla kutangazwa hapo Novemba 28 mwaka huu ambapo CCM katika Jiji la Tanga kimeibuka kidedea kwa kushinda viti vyote vya kuanzia wajumbe na wenyeviti wa mitaa yote.

Wakizungumza na Waandishi wa Habari wakati wa tamko la pamoja,Mussa Mbarouk ambaye ni Mwenyekiti wa Chama cha Wananchi (CUF) wilaya ya Tanga alisema kwamba uchaguzi ulifanyika kwa njia ya amani japo kulikuwa na dosari ndogondogo ambazo wanaamini zitafanyiwe kazi,

"Mchakato wa Uchaguzi huu ulienda vizuri, tulikuwa tukishirikiana na Serikali ya Mkoa na Jiji, kulikuwa na dosari ndogondogo lakini hata sisi vyama vya siasa tunatakiwa tukae na tuungane ili yale maeneo yote yenye Wagombea wanaokubalika tumuunge mkono" Alisema Mbarouk


Mbarouk alisema kwamba chama chake pamoja na vyama vyote shiriki katika Uchaguzi huo vimesikitishwa na matokeo ya jumla ambapo hakuna chama cha upinzani kilichoshinda kiti hata kimoja.

" Uchaguzi wa Serikali za mitaa wa mwaka 2019 tulipata walau viti 61,lakini safari hii haijawahi kutokea kiukweli ni lazima tujipange vizuri Uchaguzi Mkuu Ujao mwaka 2025" Alisisitiza Mbarouk

Naye kwa upande wake Mwenyekiti wa Ngome ya Vijana Chadema Hemed Bakari alisema kuna umuhimu mkubwa kwa vyama vya siasa kuongeza nguvu ya ushawishi kwa wapiga kura,

Kwa upande wake Katibu wa chama cha Mapinduzi (CCM) wilaya ya Tang Shaban Kalaghe alisema mchakato wa Uchaguzi huo ulienda vizuri na kuwashukuru watu wote waliojiandikisha na kupiga kura,

“Kwa kweli niwapongeze wasimamizi wa uchaguzi huu ulienda vizuri tulikuwa na wagombea kwenye mitaa yote na tumeshinda kwa asilimia 100 lakini pia tunawashukuru wenzetu wa vyama vingine kwakukubali matokeo ni jambo zuri na linaonyesha ukomavu mkubwa wa kisiasa”Alisema

Hata hivyo alisema kwamba uchaguzi huu umeisha na sasa wanakwenda kufanya kazi lakini pia kujiandaa na Uchaguzi Mkuu wa mwaka 2025

DK. NAWANDA AACHIWA HURU, ASEMA ANAMWACHIA MUNGU.

 

MAHAKAMA ya Hakimu Mkazi Mkoa wa Mwanza imemuachia huru aliyekuwa Mkuu wa Mkoa wa Simiyu, Dk.Yahaya Nawanda baada ya kupokea na kusikiliza ushahidi wa pande zote mbili.

Akitoa hukumu hiyo baada ya kesi kusikilizwa kwa muda wa miezi minne Hakimu Mfawidhi wa Mahakama hiyo, Erick Marley amesema ushahidi uliotolewa na upande wa Jamuhuri umeacha shaka katika maeneo mbalimbali hivyo kutomtia hatiani Dk.Nawanda.

Ametaja maeneo hayo kuwa ni pamoja na video mjongeo 'CCTV footage' zilizowasilishwa kutokuonesha sehemu wawili hao walikuwa kwenye gari wakitenda tukio hilo.

Vilevile amesema sehemu nyingine iliyoacha shaka ni Jamuhuri kutokuwasilisha vipimo vya DNA vilivyochukuliwa kwa wawili hao.

Kadhalika amesema sehemu nyingine iliyoacha shaka ni maelezo ya shahidi namba mbili ambaye ni binti aliyedaiwa kulawitiwa.

Amesema kwenye ushahidi wake alidai kufanyiwa ukatili huo kwenye gari nyeupe lakini gari hilo haikuwa nyeupe bali ya silver.

Pia amesema binti huyo alisema wakati anafanyiwa kitendo hicho gari lilikuwa na vioo 'tinted' na nje hakukuwa na watu waliokuwa wanapita lakini video zilionesha gari hilo halikuwa na 'tinted' na pia watu waliokuwa wakipita nje na kuendelea na shughuli zao.

WAZIRI MHAGAMA AZINDUA USAMBAZAJI WA RIPOTI YA UTAFITI WA VIASHIRIA NA MATOKEO YA UKIMWI 2022-2023

Na.Mwandishi Wetu - Ruvuma

Waziri Afya Mheshimiwa Jenista Mhagama amezindua Usambazaji wa Ripoti ya Utafiti wa Viashiria na Matokeo ya UKIMWI 2022-2023 Mkoani Ruvuma.

 Akizungumza katika uzinduzi huo uliofanyika Wilaya ya Songea Mkoani Ruvuma tarehe 29 Novemba, 2024 Waziri Mhagama alieleza mafanikio makubwa yaliyopatikana katika juhudi za kudhibiti maambukizi ya UKIMWI nchini Tanzania ambapo imeelezwa kuwa kiwango cha Maambukizi Mapya kimepungua huku akipongeza juhudu zinazofanywa na Tume ya Kudhibiti UKIMWI Nchini 

"Kwa mujibu wa ripoti hiyo, kiwango cha maambukizi ya UKIMWI nchini kimepungua kwa kiasi kikubwa kutoka asilimia 7 mwaka 2022 hadi asilimia 4.4 mwaka 2023. Aidha, juhudi za kupunguza maambukizi ya mama kwenda kwa mtoto zimezaa matunda, ambapo kiwango cha maambukizi kimepungua kutoka asilimia 18 mwaka 2010 hadi asilimia 8.1 mwaka 2023," alisema Waziri Mhagama

Waziri Mhagama alieleza kuwa mafanikio haya yametokana na juhudi za Serikali kwa kushirikiana na wadau wa maendeleo, sekta binafsi, na jamii katika kuimarisha programu za utoaji elimu, upimaji wa hiari, na matumizi ya dawa za kufubaza makali ya virusi vya UKIMWI (ARVs).

Alisisitiza umuhimu wa kuendelea na juhudi hizi ili kufikia malengo ya kumaliza maambukizi mapya ya UKIMWI, hasa kwa watoto, ifikapo mwaka 2030. Vilevile, aliwahimiza wananchi kuendelea kuchukua hatua za kujikinga na maambukizi na kufuata ushauri wa kitaalamu.

Aidha alitoa wito kwa jamii kuunga mkono mikakati ya kitaifa ya kupambana na UKIMWI ili kuhakikisha maendeleo ya afya ya jamii na uchumi wa taifa kwa ujumla.

Kwa upande wake Naibu Waziri Ofisi ya Waziri Mkuu anayeshughulikia masuala ya Sera, Bunge na Uratibu Mheshimiwa Ummy Nderiananga, amesema Watanzania wamepiga hatua kubwa katika mapambano dhidi ya maambukizi ya Virusi vya UKIMWI (VVU)ambapo asilimia 98 ya Watanzania wanaohitaji dawa za kufubaza makali ya virusi hivyo (ARVs) sasa wanatumia dawa hizo, hatua ambayo imevuka malengo yaliyowekwa kitaifa na kimataifa.

Mhe. Ummy alibainisha kuwa mafanikio haya ni matokeo ya jitihada za serikali kwa kushirikiana na wadau mbalimbali, ikiwemo utoaji wa elimu ya afya, upimaji wa hiari, na utoaji wa dawa kwa urahisi katika vituo vya afya.

Pia ametumia nafasi hiyo kuhimiza wananchi kuendelea kuchukua hatua za kujikinga na kuelimisha jamii kuhusu umuhimu wa kuendelea kutumia dawa kwa walioambukizwa ili kuboresha maisha yao na kupunguza maambukizi mapya.

Serikali inaendelea kuweka mikakati imara kuhakikisha kila Mtanzania anayehitaji huduma za matibabu anazipata kwa wakati.

Maadhimisho ya Wiki ya UKIMWI Duniani yanaadhimishwa Kitaifa mkoani Ruvuma yenye kauli Mbiu isemayo "Chagua Njia Sahihi, Tokomeza UKIMWI"

=MWISHO=

WAZIRI DKT ASHATU KIJAJI MGENI RASMI MASHINDANO YA CLIMATE CHANGE MARATHON 2024 WILAYANI PANGANI

 

WAZIRI wa Nchi, Ofisi ya Makamu wa Rais Muungano na Mazingira Dkt Ashatu Kijaji anatarajiwa kuwa mgeni rasmi katika Mashindano ya Riadhaa ya Climate Change 2024 yatakayofanyika wilayani Pangani kesho Novemba 30 mwaka huu.

Mashindano hayo yameandaliwa na Asasi ya Kiraia ya Tree Of Hope kwa kushiriana na Asasi nyengine za Mtandao wameandaa mbio hiyo fupi katika Mji Mkongwe wa Pangani na wageni kutoka maeneo mbalimbali Tanzania Bara na Visiwani watashiriki.

Akizungumza katika mkutano na waandishi wa habari Mkuu wa wilaya ya Pangani Gift Msuya alisema maandalizi  ya mbio hizo yamekamilika na yamefikia zaidi ya asilimia 90 ambapo wanatarajia Waziri Dkt Ashatu Kijaji kuwasili wilayani humo akiwemo Rais wa Chama cha Riadha nchini (RT) Anthony Mtaka,

Msuya alisema kwamba kwa upande wa njia ambazo zitatumika kwa wakimbiaji hao zipo katika hali nzuri na maeneo ya malazi yapo vizuri huku akisisitiza suala la ulinzi na usalama limeimarishwa kuhakikisha kila kitu kinafanyika kama kilivyopangwa.

Alitaja mbio ambazo zitakimbiwa na wakimbiaji kuwa ni zile zenye umbali wa Kilomita 21,Kilomita 10 na Kilomita 5 ambapo wakimbia wasiopungua 300 kutoka Tanzania Bara na Visiwani wanatarajiwa kushiriki mbio hizo.

Aidha aliwakaribisha wadau wote wa mbio na mazingira huku akieleza lengo lake ni kushirikisha wadau wa mazingira kuchangia upatikanjaji nishati safi ya kupikia ikiwa kumuunga mkono Rais Dkt Samia Suluhu ambaye ndie kinara wa matumizi ya nishati safi ya kupika katika Taifa ,Africa na Duniani .

Hata hivyo alisema kwamba wanatarijia kupata majiko ya gesi na nishati mbadala kwa kaya mbalimbali hasa zile ambazo hazijiwezi kutumia nishati safi kwa sababu ya kipato.

Awali akizungumza Mkurugenzi wa Asasi ya Kiraia ya Tree Of Hope Fortunata Manyeresa kwamba kupitia mbizo hizo wanakwenda kuleta hamasa mpya na kujenga uelewa wa jamii kuhusu mabadiliko ya tabia ya nchi na athari zake

Manyeresa alisema pia itawajengea wananchi uhimilivu na ustahilimivu kwa masuala ya mabadiliko ya tabia ya nchi na wanaamini kwamba yana athari kubwa kwa jamii na yanawalenga sana wanawake.

Alisema kwa sababu mwanamke ndio wanakwenda kutafuta kuni na maji na usalama wa chakula nyumbani ukiwa dhaifuna kukiwa hakuna chakula watoto wanakwenda kumuambiwa mama.

KOCHA MPYA YANGA AKARIBISHWA NA KICHAPO KLABU BINGWA AFRIKA.

 

MABINGWA wa Tanzania, Yanga wameanza vibaya michuano ya Ligi ya Mabingwa Afrika baada ya kuchapwa mabao 2-0 nyumbani na Al Hilal Omdurman ya Sudan katika mchezo wa Kundi A Uwanja wa Benjamin Mkapa Jijini Dar es Salaam.

Mabao yaliyoizamisha Yanga leo yamefungwa na washambuliaji Adama Coulibaly wa Mali dakika ya 63 akimalizia pasi ya beki Altayeb Abdelrazig na Yasir Mozamil dakika ya 90 akimalizia pasi ya kiungo Abdel Raouf Yagoub.

Yanga leo iliongozwa na kocha mpya, Mjerumani mwenye asili ya Bosnia and Herzegovina, Sead Ramovic aliyechukua nafasi ya Muargentna Miguel Angel Gamondi aliyefukuzwa wiki iliyopita.

Huo unakuwa mchezo wa tatu mfululizo Yanga kufungwa – pamoja na zile mbili za Ligi Kuu walizochapwa 1-0 na Azam FC na 3-1 na Azam FC Uwanja wa Azam Complex, Chamazi, Dar es Salaam zilizomfukuzisha Gamondi.

Mechi nyingine ya Kundi A leo, wenyeji TP Mazembe wameambulia suluhu mbele ya MC Alger Uwanja wa TP Mazembe Jijini Lubumbashi, Jamhuri ya Kidemokrasia ya Kongo (DRC). 

Yanga watakuwa na mchezo mmoja wa Ligi Kuu ya NBC Tanzania Bara dhidi ya Namungo FC Jumamosi Uwanja wa Majaliwa, Ruangwa mkoani Lindi kabla ya kusafiri kwenda Algeria kwa ajili ya mchezo wa pili wa Kundi Ligi ya Mabingwa dhidi ya wenyeji, MC Alger Desemba 7 kuanzia Saa 4:00 usiku Uwanja wa Julai 5, 1962 Jijini Algiers.  

SUALA LA UKATILI WA KIJINSIA NI SUALA LA AIBU - UZINDUZI WA KAMPENI YA SIKU 16 ZA UANAHARAKATI DHIDI YA UKATILI WA KIJINSIA 2024

  

WAZIRI  wa Sheria na Katiba  Profesa  Palamagamba Kabudi, amezindua rasmi SIKU 16 ZA UANAHARAKATI DHIDI YA UKATILI WA KIJINSIA WENYE KAULI MBIU YA 'KUELEKEA MIAKA 30 YA BEIJING CHAGUA KUTOKOMEZA UKATILI WA KIJINSIA'.

Akizindua uzinduzi huo leo jijini Dar es Salaam ambapo  wadau na wanaharakati mbalimbali wameweza kushiriki uzinduzi huo,Prof. Palamagamba  alisema ukatili wakijinsia unapaswa kupingwa kwa nguvu zote.

Amesema suala la  ukatili wa kijinsia ni suala la aibu linalobeza kundi kubwa katika jamii na si la kifahari kulitetea.

''Suala hilo la ukatili wa kijinsia ni suala baya na linalohitaji kutokomezwa na hali budi kuchukuliwa hatua stahiki.

''Katika sheria zetu mbalimbali tunasheria nyingi zinazopinga ukatili wa kijinsia na zinaelezea masuala hayo na kutoa adhabu kali ikiwemo sheria ya kanuni ya adhabu sura ya 16 mkiisoma sheria hiyo imeelezea ukatili katika maeneo mengi,''amesema na kuongeza

''Miongoni mwa sheria hiyo imeeleza ukatili wa kutowanunulia nguo watoto wao,kutonunua Chakula kwa watoto ni kosa la jinai  na lipo ndani ya adhabu,usipowatunza watoto lakini pia sheria ya huduma ya msaada wa sheria sura ya 21 nayo inazungumza utoaji wa msaada wa kisheria kwa wanawake na watoto.

Amesema licha ya Tanzania kupiga hatua katika mapambano hayo bado inahitaji kupiga hatua zaidi na kutaka kila mmoja awe balozi wa kupinga ukatili wa kijinsia.

Prof. Kabudi alisema ni adhima ya taifa kuungana katika mapambano dhidi ya ukatili wa kijinsia kwani vitendo hivyo vinagharimu maisha ya watu wengi.

''Sasa ni wakati wa kila mmoja wetu kuwa balozi wa kuhakikisha anapinga ukatili wa kijinsia kwani kunasheria mbalimbali zinatambua masuala hayo ya ukatili wa kijinsia..

Aidha alisema moja ya mambo ambayo hayapaswi kuyaacha  ni kuendeleza mapambano dhidi ya ukatili wa kijinsia ''Niwaombe kampeni hii iwe endelevu isiishie kwenye hizi iku 16 ,Serikali itaendelea kushirikiana na wadau kuhakikisha kunakuwa na usawa wa kijinsia na utu wa wanawake,''alisema.

Kwa upande wake Mwenyekiti wa  Bodi Shirika la Wanawake katika Sheria na Maendeleo Barani Afrika (WiLDAF), Dk. Monica Muhoja amesema kuna haja ya kuongeza kasi zaidi katika kumuinua mwanamke sambamba na kutungwa kwa sheria maalum za kupinga ukatili wa kijinsia.

 Amesema wanawake na watoto wameendelea kuwa waathirika wa vitendo hivyo na kwamba wako tayari kubainisha mapungufu yaliyopo kwenye Sheria ya Kanuni ya Adhabu kwa kuwa walifanya utafiti.

Amesema serikali imekuwa ikishughuļikia maombi mbalimbali wanayowasilisha hivyo kwa mwaka huu wameomba serikali kuendelea kuyachukulia hatua maombi wanayoyaomba kushughulikiwa  .

"Mwaka huu tumekuja na maombi mengine ambapo tunaomba Serikali kuweza kuyashughulia ikiwemo ombi la kutumia juhudi za kuwafikishia kwenye agenda za kiusalama kwa kuhakikisha kuwa masuala ya ukatili wa kijinsia yanaingizwa rasmi katika mipango na mikakati ya kiusalama ya kitaifa.

"Maombi mengine ni pamoja na  serikali ni kuomba kutungwa kwa sheria mahsusi ambayo italinda jamii hasa wanawake na watoto dhidi ya unyanyasaji na ukatili wa kijinsia.

Naye Mkurugenzi wa WiLDAF (Women in Law and Development in Africa), Anna Kulaya alisema dhamira ya Kampeni hiyo  ni kushawishi na kuhamasisha jamii kuondoa mitazamo inayochochea unyanyasaji na ukandamizaji wa kijinsia huku ikikuza usawa,heshima na haki kwa wote.

“Leo ni siku muhimu sana kwetu sote tunapoanza safari ya kuelekea Siku 16 za Uanaharakati wa Kupinga Ukatili wa Kijinsia, Hii ni fursa ya kipekee ya kushirikiana, kuhamasisha, na kuchukua hatua za pamoja dhidi ya aina zote za ukatili wa kijinsia kwa ajili ya jamii yenye usawa, heshima, na haki kwa wote.

 “Muungano huu ulipoanzishwa ulikuwa na mashirika tisa tu, lakini kwa miaka kadhaa umeendelea kukua na kuvutia wanachama wengi, kutokana na juhudi zake za pamoja za kupinga ukatili wa kijinsia na kukuza usawa wa kijinsia katika jamii.,"alisema. 

Alisema Mkuki ni harakati inayolenga kuleta mabadiliko chanya katika jamii kwa kukuza uelewa na kubadili fikra potofu zinazoendeleza ukatili wa kijinsia. 

“Mkuki ni muungano mkubwa wa mashirika zaidi ya 200, unaofanya kazi chini ya uratibu wa WiLDAF (Women in Law and Development in Africa),dhamira yake kuu ni kushawishi na kuhamasisha jamii kuondoa mitazamo inayochochea unyanyasaji na ukandamizaji wa kijinsia, huku ikikuza usawa, heshima, na haki kwa wote.”alisema na kuongeza 

 "Kupitia elimu, kampeni za kijamii, na ushirikiano na wadau mbalimbali, Mkuki inalenga kuwa sauti ya mabadiliko na chachu ya jamii yenye amani, heshima, na utu kwa kila mtu bila kujali jinsia,"alisema. 

NLD YAHIMITISHA KAMPENI KWA KISHINDO HANDENI YAWAOMBA WANANCHI KUWAPA RIDHAA WAGOMBEA WAO ILI WAWAPE MAENDELEO

 

Na Oscar Assenga,HANDENI.

CHAMA cha The National League For Democracy (NLD) kimehitimisha kampeni kwa wagombea ambao wanawania nafasi za uongozi katika uchaguzi wa Serikali za Mitaa utakaofanyika Novemba 27 mwaka huu huku wakiwawataka wananchi kuwapa ridhaa ili waweze kuwapa maendeleo.

Akizungumza wakati wa mkutano wa kampeni wa kuhitimisha kampeni hizo katika viwanja vya soko la Misima wilayani Handeni,Katibu Mkuu wa NLD Doyo Hassani Doyo alisema kwamba chama hicho kimejipanga kuhakikisha wanatatua kero za wananchi zinazowakabili kwa muda mrefu.

Alisema kwamba wagombea ambao wamewasimamisha kwenye maeneo yote wanauwezo mkubwa wa kuweza kuwatumikia wananchi na kuwasaidia kutatua changamoto ambazo zinawakabili kutokana na kwamba wanatosha na uwezo wa kuwaongoza.

“Sisi katika uchaguzi huu tumewasimamisha wagombea wasiokuwa na njaa lakini pia wenye uwezo wa kutoa ajira kwa wengine kupitia fursa tulizonazo na wengi wametoa ajira kwenye jamii zinazowazunguka”Alisema

Awali akizungumza Mwenyekiti wa NLD wilaya ya Handeni Rajabu Doyo aliitaka Taasisi ya Kuzuia na Kupambana na Rushwa kufanya uchunguzi haraka iwezekanavyo kwa baadhi ya wagombea wa vyama vya siasa kuandika barua za kujitoa kwenye uchaguzi huo wa Serikali za Mitaa.

“Haiwezekani mgombea anachukua fomu ya kugombea anaijaza halafu akairudisha alafu leo unaambiwa kajitoa hii ni rushwa ya wazi wazi kabisa kwa hiyo tunaiomba Takukuru iingilie kati haraka iwezekanavyo “Alisema