MWANAFUNZI AOKOTWA AKIWA AMEFARIKI DUNIA

KIRANJA wa Shule ya Sekondari ya Nyahururu Elite ameripotiwa kuaga baada ya matembezi katika Mlima Longonot Naibu Kamishna wa Naivasha Mutua Kisilu alithibitisha. 

 Mwalimu mkuu Simon Gacheru aliripoti kuwa wanafunzi 26 wa kidato cha nne na walimu 10 walienda kuukwea mlima pamoja na watu wengine 70. 

Gacheru alisimulia kuwa saa chache baada ya kuukwea Mlima na kushuka, Enock Balemba, mwanafunzi huyo alianza mahangaiko na kumwambia wenzake kwamba hawezi kuendelea na safari.

Alifichua kuwa Balemba aliamua kusalia nyuma na kuketi chini huku wengine wakiendelea na safari.

Kulingana na mwalimu huyo, mwanafunzi huyo hakukaa kwa muda mrefu kabla ya kutoweka msituni na kutorejea tena. “Ghafla alisimama na kukimbia kuelekea kwenye vichaka na kutoweka. 

Wanafunzi wengine waliingiwa hofu na kumjulisha mwalimu wao kuhusu hilo,” Gacheru alieleza. 

Mwalimu mkuu anasemekana kuwajulisha maafisa Huduma ya Wanyamapori walioko Mlima Longonot ambao walianza msako ila juhudi zao hazikufaulu hadi usiku ulipoingia wakiwa kichakani. 

Kamishna Mutua alifichua kuwa maafisa hao waliendelea na kumtafuta mwanafunzi huyo wa kidato cha nne mnamo Alhamisi, Oktoba 27.

 Kikosi cha upekuzi kilimpata akikaribia kilele cha Mlima Longonot. Kutokana na uchunguzi wake, mwanafunzi huyo alikuwa na michubuko mikononi mwake na pia alikuwa akipumua kwa umbali. 

Kamishna huyo alisema michubuko hiyo huenda ilitokana na migwaruzo aliyopata alipokuwa akihangaika kupanda mlima akijaribu kuwatafuta wanafunzi wenzake. 

Kikosi cha uokoaji kilimsafirisha kwa ndege Balemba kwa matibabu, lakini wakati alipofika hospitalini madaktari walisema alikuwa amekata roho.

Tupe maoni yako