JPM AMTUMBUA 'BOSI WA TANESCO'

MHANDISI Felchesmi Mramba aliyekuwa Mkurugenzi Mtendaji wa Shirika la Umeme la Taifa (TANESCO) amekuwa mtumishi wa kwanza wa serikali kutimuliwa kazi na Rais John Magufuli kwa mwaka 2017.

Mramba ameng’olewa ikiwa ni siku moja tu tangu Mamlaka ya Uthibiti wa Huduma ya Nishati na Maji (EWURA) kutangaza kuwa bei ya umeme itapanda kwa asilimia tano, kuanzia Januari Mosi mwaka huu kufuatia maombi ya Tanesco iliyotaka kupandisha bei ya nishati hiyo kwa angalau asilimia 18.

Hata hivyo masaa machache baada ya taarifa hiyo ya Ewura, Profesa Sospeter Muhongo, Waziri wa Nishati na Madini alitangaza kuzuia kupanda kwa bei hiyo, huku akiishushia tuhuma menejimenti ya Tanesco kuwa inapandisha bei ili ipate fedha za kugawana kama sehwmu ya marupurupu yao.

Taarifa iliyotolewa jioni hii na Gerson Msigwa, Mkurugenzi wa Mawasiliano ya Rais, Ikulu imesema kuwa Rais Magufuli ametengua uteuzi wa Mramba huku akimteua Dk. Tito Esau Mwinuka ili kukaimu nafasi hiyo.

Rais Magufuli amefanya maamuzi hayo akiwa ziarani mkoani Kagera ambapo kabla ya kutangazwa rasmi kwa uamuzi huo, asubuhi ya leo alipohudhuria misa katika ibada iliyofanyika Kanisa Kuu la Jimbo Katoliki la Bukoba alinukuliwa akisema kitendo cha kupandisha umeme hakikubaliki kwani serikali yake ipo katika juhudi za kuanzisha uchumi wa viwanda na kusambaza umeme vijijini.

“Ndiyo maana tunasema muendelee kutuombea kwani majipu bado yapo na nitaendelea kuyatumbua,” alisema Rais Magufuli

Tupe maoni yako