JESHI LA POLISI LAFUNGIA VYUO VYA MAFUNZO UDEREVA 161 KWA KUKOSA SIFA.

 

Jeshi la Polisi kitengo cha Usalama Barabarani limezifungia vyuo vya mafunzo ya udereva 161 kutokana na kukosa sifa ya kutoa mafunzo hayo.

Kupitia taarifa iliyotolewa na jeshi hilo, vyuo hivyo vilibainika baada ya ukaguzi walioufanya kuanzia Machi mosi hadi April 29, 2023.

Kulingana na taarifa hiyo ya Jeshi la Polisi, kufuatia uhakiki wa leseni uliofanyika Machi mosi hadi April 29 mwaka huu, madereva waliosajiliwa wenye leseni C na E ni  milioni 1.59  huku leseni 20,944 zikiwa zimehakikiwa.

Kati ya hizo leseni 17,726 za madereva zimebainika kuwa na sifa na wamepewa barua ya udhibitisho, leseni 3,214 zimefutiwa madaraja kwani madereva wa leseni hizo hawana sifa ya kuwa na madaraja C na E kutokana na kutosomea madaraja stahiki,"imesema taarifa hiyo

Pia, taarifa hiyo imebainisha kwamba kwa upande wa uhakiki wa vyuo vinavyotoa mafunzo ya udereva vilivyoanza Januari mwaka huu hadi April ilibainika ni vyuo 134 pekee ndio vyenye sifa kati ya 297, Vyuo 161 vikibainika kutokidhi vigezo. 

Kwa upande wake, Mkurugenzi wa shule ya udereva ya Pachoto, Juma Manguya amesema shule hiyo ilipewa kibali cha kutoa mafunzo ya fani hiyo na jeshi hilo tangu mwaka 2018 lakini anashangaa kufungiwa kwa madai hakina sifa.

Nimeshangaa kuona kupitia operesheni waliyoianzisha wanafuta vyeti vilivyotolewa na shule yangu wakati jeshi liliruhusu siyo jambo jema ni muhimu wakaangalia upya suala hili Kwa sababu watu waliwekeza muda wao.

Tupe maoni yako