ALIYEKUWA MGOMBEA UBUNGE JIMBO LA SUMVE AKAMATWA KWA TUHUMA ZA KUGUSHI NA UTAPELI.

NA PETER FABIAN, MWANZA.

  

MKURUGENZI na Mmiliki wa shule binafisi ya Ntunduru, Richard Mchele na mwanamke mmoja wamekamatwa na Polisi kwa tuhuma za kugushi Hati ya nyumba na Nyaraka ili kujipatia nyumba moja kwa utapeli Mjini Sengerema na kutaka kuiuza kwa mtu mwingine Wilayani Sengerema mkoani Mwanza.

Taarifa za kukamatwa kwa Mchele ambaye aliyekuwa mgombea Ubunge Jimbo la Sumve kwa tiketi ya Chama Cha Wananchi (CUF) katika uchaguzi mkuu wa Oktoba 25 mwaka huu walikamatwa na Polisi baada ya kuwepo taarifa za yeye na mwanamke mmoja anayedaiwa kuwa na mahusiano naye ya kimapenzi kula njama za kugushi Hati ya nyumba na nyaraka ili kujipatia nyumba mali ya Mkama Magesa wa mkazi wa Sengerema.

Mchele alikuwa akitafutwa kwa muda na mlalamikaji Mkama na Polisi na kufanikiwa kukamatwa mjini Sengerema akiwa na mwanamke huyo ambaye hakutajwa jina lake na kisha kusafilishwa hadi jijini Mwanza ambako alifunguliwa jarada la uchunguzi RB  MW/IR/750/2015 lililofunguliwa Kituo cha Polisi Kati Nyamagana na Mkama.

Habari zilizothibitishwa na Kaimu Kamanda wa Polisi mkoani Mwanza, Augustino Senga, alikili kuwepo taarifa za kukamatwa watuhumiwa hao ambao walikuwa wakisakwa kwa muda mrefu na mlalamikaji kwa kushirikiana na Polisi ili kukabiliana na tuhuma zinazomkabili yeye na wenzake  walifunguliwa jarada la uchunguzi katika kituo cha Polisi mjini Kati.

“Ni kweli Mchele na mwenzake tumewakamata, wakati wowote watafikishwa mahakamani kujibu tuhuma za kughushi hati na nyaraka za nyumba isiyokuwa yao na kutaka kuiuza kitapeli kwa mtu mwingine,” alisema Senga bila kumtaja mnunuzi huyo.

Senga ambaye pia ni Mkuu wa Upelelezi Makosa ya Jinai (RCO) mkoani Mwanza, alieleza kwamba watuhumiwa hao akiwemo mwanamke mmoja ambaye anadaiwa kuwa na mahusiano ya kimapenzi na Mchele, walikamatiwa wilayani Sengerema na kusafirishwa hadi jijini Mwanza.

Alifafanua kuwa Mkama alipata taarifa za kutaka kuuzwa kwa nyumba yake kutoka kwa wasamilia wema ambao walidai hati ya nyumba hiyo imeandikwa jina la mwanamke huyo ambaye ana mahusiano naye badala ya mtu aliyemuuzia Magesa, sasa Polisi inaendelea na upelelezi na wakati wowote itawafikisha Mahakamani kujibu tuhuma za kosa linalowakabili.

Mchele aligombea ubunge wa jimbo la Sumve katika uchaguzi Mkuu uliopita wa Oktoba 25 mwaka huu kupitia CUF akitokea CCM akishindana na Mbunge wa Sumve, Richard Ndassa (CCM) katika mchakato wa kura za maoni ndani ya CCM kabla ya kushindwa kwenye uchaguzi mkuu tena uliopita.

Tupe maoni yako