MAKAMU WA RAIS ANAYE SHUGHULIKIA MAZINGIRA BINILITH MAHENGE KUZINDUA MAADHIMISHO YA KITAIFA SIKU YA MAZINGIRA DUNIANI KITAIFA JIJINI MWANZA

WAZIRI Ofisi ya Makamu wa Rais anayeshughulikia Mazingira Binilith Mahenge kuzindua rasmi kesho maadhimisho ya kitaifa ya siku ya Mazingira Duniani yanayofanyika kitaifa jijini Mwanza Juni 5 mwaka huu mkoani Mwanza.  

Akizungumza na waandishi wa habari jana mkoani hapa, Kaimu Mkuu wa Mkoa wa Mwanza, Baraka Konisaga ambaye ni Mkuu wa Wilaya ya Nyamagana alisema kwamba, maadhimisho hayo yataanza rasmi jumatatu katika viwanja vya Furahisha vilivyopo Kata ya Kirumba wilayani Ilemela ambapo yatazinduliwa na Waziri Mahenge kwa maonyesho na shughuli mbalimbali za mazingira.

Konisaga alieleza kuwa kutokana na heshima ya kupewa hadhi kwa mkoa wa Mwanza ya kuandaa maadhimisho hayo ya kitaifa ya kila mwaka, kumeandaliwa shughuli mbalimbali ikiwemo maonyesho kutoka kwa wadau mbalimbali wa mazingira ndani na nje ya nchi, vikundi na wananchi kushiriki katika kufanya usafi katika maeneo ya Jiji na Manispaa ya Ilemela ikiwa ni sehemu ya Jiji la Mwanza.

“Maadhimisho ya mwaka huu yanayo kauli mbiu ‘Tunza Mazingira Ili Kukabiliana na Mabadiliko ya Tabianchi’ lakini pamoja na maonyesho hayo zitakazofanyika ziara katika maeneo tofauti yanayojihusisha na utunzaji wa mazingira ikiwemo viwanda jijini hapa, pia shughuli za uopoaji magugu maji ndani ya Ziwa Victoria, upandaji miti, uzoaji taka na kuhamasisha wananchi na wadau kwa makongamano,” alisema.

Aidha Kaimu huyo aliongeza kuwa ya uzinduzi huo, Kamati ya kitaifa ya Maadhimisho ya kilele cha siku ya Mazingira Duniani itaendelea na utaratibu wa kuandaa taratibu za utoaji Tuzo, Zawadi na Veti kwa washindi na wadau mbalimbali mambo mengine huku  Juni 5 mwaka huu itakuwa ndiyo kilele chake ambapo mgeni rasmi atakuwa Makamu wa Rais wa Jamhuri ya Muungano wa Tanzania Dkt.Mohamed Gharib Bilali.

Usafi unaendelea maeneo mbalimbali mkoani hapa. 

“Tutakuwa na ugeni mkubwa wa kitaifa na kutakuwa na wageni wengine kutoka sehemu mbalimbali  ya nchini ambao ni wadau wa mazingira na kutoka mataifa ya nje, Kenya, Uganda, Burundi, Rwanda na mashirika ya kimataifa yanayojihusisha na mazingira” alisisitiza.

Ametoa wito kwa wananchi kuendelea na jukumu la usafi na kuliweka Jiji la Mwanza na Manispaa ya Ilemela katika mwonekano halisi wa kupokea tuzo na wageni hao ili kuwezesha pia kutangaza vivutio mbalimbali vya uwekezaji, utalii na maliasili ya Jiji hili linalikuwa kwa kasi ya asilimia 11 kila mwaka barani Afrika huku pia akiwataka kujitokeza kwa wingi katika maonyesho na siku ya kilele cha maadhimisho hayo.

Tupe maoni yako