JITOKEZENI WAKATI WOTE KUKISAIDIA CHAMA (CCM) SIYO KUSUBILI WAKATI WA KUWANIA UONGOZI: MATHAYO

 Mjumbe mstaafu wa Baraza Kuu la UVCCM taifa wa mkoa wa Mwanza, Barnabas Mathayo, akizungumza na vikundi mbalimbali vya ujasiliamali toka mashina matano ya CCM wilaya ya Ilemela ambapo pia alitoa msaada wenye jumla ya thamani ya shilingi milioni 15.9.

NA PETER FABIAN.

MWANZA.

VIONGOZI na wananchama wa CCM wenye uwezo wa kifedha, wametakiwa kuacha uchoyo na ubinafsi kwa kujitokeza kukichangia chama na jumuiya zake  katika kukuza mitaji na kuwajengea uwezo wananchi ili kukisaidia chama kuvuka malengo ya ilani ya uchaguzi 2010-2015.

Kauli hiyo ilitolewa na Mjumbe mstaafu wa Baraza Kuu la UVCCM taifa wa mkoa wa Mwanza, Barnabas Mathayo, mwishoni mwa wiki wakati akizindua mashina matano ya UVCCM Katani Kirumba, wilayani Ilemela na kusaidia vikundi vya wajasiriamali na Umoja wa Vijana (UVCCM) wilaya ya Ilemela, msaada wenye thamani ya sh milioni 15.9

Msaada huo ni pamoja na pikipiki sita zenye thamani ya sh Milioni 12 (kwa UVCCM) Wilaya ya Ilemela na fedha taslimu sh milioni 3.9 aliyakabidhi viongozi wa mashina matano ya UVCCM pamoja na vikundi vitatu vya akina mama na vijana wajasiriamali wa Kata ya Kirumba wilayani humo. 

“ Msaada huu siyo kwa nia ya mimi kugombea nafasi ya Ubunge au Udiwani na si kwamba ninavyo vingi bali ni moyo wa kujitolea kukisaidia Chama chetu ninacho kipenda, tatizo la wana CCM wengi wetu wenye uwezo ni wachoyo na wagumu wa kukisaidia Chama.” Alieleza Mathayo.

Mjumbe huyo mstaafu akiwaomba wana CCM wengine wenye uwezo wajitolee kukisaidia Chama na jumuia zake na hasa katika kipindi hiki cha kuelekea katika chaguzi za Serikali za Mitaa na Uchaguzi Mkuu wa mwaka 2015 ili CCM iweze kurejeshe majimbo na Kata ilizopoteza , alidai kuwa wana CCM wafanye kazi kwa pamoja na kuacha porojo kama za wabunge wa Chadema wa Ilemela na Nyamagana.

“ Wazee mkisikia vijana tunajitolea kukisaidia Chama msinune na kulalama kuwa fulani anataka kugombea Ubunge au Udiwani, ukitoka CCM hujafanya kitu cha kukumbukwa utachekwa, acheni ubinafsi, uchoyo na kubeza watu wanaojitolea kukisaidia na kukiimarisha Chama, tuungeni mkono ili tukomboe majimbo ya Ilemela na Nyamagana.” Alieleza na kushangiliwa na umati mkubwa wawatu.

Mathayo alianza mwaka 2010 kabla ya kustaafu wadhifa huo alipomwaga pikipiki 25 zenye thamani ya sh milioni 37.5 kwa UVCCM wilaya za Ukerewe, Misungwi, Kwimba, Magu na Sengerema (kila wilaya tano tano) na Januari mwaka huu alichangisha zaidi ya sh milioni 10.7 kusaidia UVCCM kata ya Mahina wilayani Nyamagana.

 Akipokea msaada huo Mwenyekiti wa UVCCM Mkoa wa Mwanza Sixbert Ruben na kumpongeza Mathayo, alisema siasa ni uchumi na maisha, alichokifanya kisiwe chokochoko na maneno kutoka kwa baadhi ya wana CCM wanaodhani uongozi wa Chama ni kwa ajili ya maslahi yao binafsi, yanakatisha tamaa ya watu kujitolea kukisaidia Chama.

Mwenyekiti Reuben aliwataka vijana wasikubali kutumiwa na baadhi ya wana siasa wenye uchu wa madaraka ambao wanawatumia kama makalai ya kubeba zege ambao wakipata uongozi hawarudi kuwasaidia na kukumbuka kuwasaidia kama Matahayo anavyofanya toka alipokuwa kiongozi na sasa mwana chama wa kawaida.

 Naye Mwenyekiti wa UVCCM wilayani Ilemela Hery James, akipokea msaada wa Pikipiki za vijana wake alisema kwamba nyenzo hizo ambazo ni mkombozi wa vijana kwa tatizo la ajira, zitatumika ipasavyo kujiletea maendeleo na kuimarisha Jumuia hiyo ikiwa pamoja na kuwahamasisha vijana wengine wanaokimbilia maandamano na vurugu za wapinzani, warudi CCM.  

Tupe maoni yako