MWANZA ILIPOSIMAMA KWA SAA KADHAA BAADA YA MABOMU YA MACHOZI KUFURUMUSHWA HOSPITALI YA BUGANDO WAKATI WA KUHIFADHI MWILI WA MWENYEKITI WA CHADEMA MKOA WA GEITA

Enzi za uhai wake aliyekuwa Mwenyekiti wa CHADEMA mkoa wa Geita Alphonce Mawazo, mwenyekiti huyo ameuawa kwa mapanga ambapo mpaka sasa jeshi la polisi linashikilia watu wanne wakituhumiwa kuhusika na mauaji hayo.

Jeneza lililobeba mwili wa aliyekuwa Mwenyekiti wa CHADEMA mkoa wa Geita Alphonce Mawazo ukiwasili katika Hospitali ya Rufaa Bugando jijini Mwanza.

Tafrani na mvutano ulizuka na hatimaye Jeshi la Polisi likalazimika kupiga mabomu ya machozi hospitalini hapo ili kumuokoa mmoja wa askari wake aliyekuwa ameingia ndani ya chumba cha kuhifadhia maiti cha hospitali hiyo, baada ya mwili wa aliyekuwa mwenyekiti wa chama cha demokrasia na maendeleo (Chadema ) mkoa wa Geita Alphonce Mawazo kuwasili kwa ajili ya kufanyiwa uchunguzi wa kidaktari. 

BOFYA PLAY KUSIKILIZA KISA NA MKASA. 

WAKATI HUO HUO.
Polisi mkoani Geita wanawashikilia watu wanne kwa tuhuma za kuhusika na mauaji ya Mwenyekiti wa Chadema mkoani humo, Alphonce Mawazo (pichani).

Mawazo alishambuliwa juzi na watu wasiojulikana katika Kijiji cha Katoro, Geita muda mfupi baada ya kutoka kwenye kikao cha ndani cha ya maandalizi ya uchaguzi wa diwani wa Kata ya Ludete.

Kamanda wa Polisi mkoani Geita, Mponjoli Mwabulambo alisema watu hao wamekatwa kwa kuhusishwa na mauaji hayo yaliyofanyika juzi saa 12.45 mchana katika eneo la Ludete A.

Mwabulambo alisema siku ya tukio kabla ya mauaji hayo, wafuasi wa Chadema walikuwa na kikao cha ndani katika eneo la Ludete B huku wenzao wa CCM wakiwa na kikao eneo la Ludete A.

“Hawa wa Chadema walivyokuwa kwenye kikao aliingia mtu akamnong’oneza Mawazo, hali iliyozua hofu kwa wengine na walipotoka nje wakakutana na kundi la watu na hapo kukazuka tafrani iliyosababisha watu wawili kujeruhiwa,” alisema.

Kamanda alidai kuwa haieleweki Mawazo alitokaje katika eneo walilokuwa wanafanyia kikao, lakini baada ya muda mfupi, wafuasi wa Chadema walipata taarifa kuwa yupo eneo la Ludete A karibu na ofisi za CCM na hali yake ni mbaya.

Alisema inadaiwa watu waliompiga Mawazo ni kundi la watu zaidi ya 10 na polisi wanaendelea na uchunguzi kuwabaini watu hao na chanzo cha mauaji hayo.

Tupe maoni yako