ILI KUZUIA MLIPUKO WA GONJWA HATARI, MBWA WAZURURAO KUUAWA: MAGU INA MBWA TAKRIBANI 12,500 WENGI WAO HAWANA MAKAZI MAALUM.

Na ALBERT G. SENGO: MAGU

HALMASHAURI ya Wilaya ya  Magu Mkoa wa Mwanza imeanza kutekeleza zoezi la kuwauwa Mbwa wazururaji wasiyo kuwa na makazi ya kudumu na kumilikiwa na watu ili kuzuia kuenea kwa kichaa cha mbwa Wilayani humo.

Hatua hiyo inatokana na Wilaya hiyo kuwa na idadi kubwa ya mbwa wapatao 12,500 ambapo wengi wao hawana makazi maalumu na wamekuwa wakizaagaa hovyo na kukumbwa na ugonjwa wa ngozi na kichaa cha mbwa na kusababisha kuwauma watu na kuwaambukiza virusi vya kichaa cha mbwa jambo ambalo limekuwa likisababisha vifo na usumbufu kwa wanaoumwa kupelekwa umbali mrefu kupatiwa tiba .

Daktari wa Mifugo wa Wilaya ya Magu Bw.Faustine Msoke ambaye pia ni Kaimu Afisa Mifugo na Kilimo wa Halmashauri ya Wilaya ya Magu amesema kuwa tayari kampeni hiyo imeanza kutekelezwa na kuwezesha kuuawa kwa mbwa wapatao 10 kwa kupigwa risasi katika kijiji cha Kitongosima kilichopo Kata ya Lugeye Wilayani humo.

Bw.Msoke amesema kuwa zoezi la kampeni hiyo maalumu litatekelezwa katika maeneo ya kata tatu ambayo yameonekana kuwa na mbwa wengi wanaozurura bila kuwa na makazi maalumu na kumilikiwa na wafugaji katika kijiji cha Kitongo sima Kata ya Lugeye,Kijiji cha Masanza kona Kata ya Kiloleli na Kata ya Magu mjini katika mitaa ya Itumbili na Nyalikungu.

“Mbwa wa aliyepata kichaa ni hatari sana kwa binadamu na wamekuwa wakiuma watu hovyo jambo ambalo husababisha kuambukiza virusi vya kichaa cha mbwa pale anapomuuma Binadamu na husababisha mgonjwa aliyeumwa na mbwa wa kichaa kuhitaji Tiba haraka na Chanjo ambayo inapatikana tu kwenye Hospitali ya Wilaya ya Magu hali ambayo ni usumbufu kwa wananchi wa maeneo ya vijijini kuhitaji kusafiri umbali mrefu kwenda kutafuta matibabu hayo”alisema Dkt.Msoke.

Ametowa wito kwa wafugaji wa mbwa kuwapenda umbwa wao na kuwadhibiti kwa kutowaruhusu kutembea hovyo mitaani na kufuata taratibu za kuwafungulia saa 1:00 usiku na kuwafungia saa 12:00 alfajiri kila siku ili kuepuka kukumbwa na ugonjwa wa kichaa cha mbwa na ngozi pamoja na kuuawa katika kampeni ya kuuwawa mbwa wazururaji.

Baada ya zoezi la kuwauwa mbwa wazururaji kumalizika na kubaki mbwa wanaomilikiwa na wafugaji kukamilika halmashauri hiyo imeandaa chanjo kwa ili kuepuka ugonjwa wa ngozi na kichaa cha mbwa.

Tupe maoni yako