CCM MKOA WA MWANZA YAFANYA MAAMUZI MAGUMU

KAMATI ya Siasa ya Chama cha Mapinduzi (CCM) Mkoa wa Mwanza imetengua na kumvua nafasi Mwenyekiti wa Halmashauri ya Wilaya ya Misungwi Benald Pollycarp baada ya kukaidi maagizo na maelekezo ya yaliyotolewa na kamati hiyo kwa Kamati ya siasa ya Wilaya ya Misungwi hivi karibuni.

Akitoa Tamko la Kamati hiyo ya mkoa iliyoketi kwenye ofisi za mkoa leo jioni na kufikia uamuzi huo Katibu wa siasa na Uenezi wa CCM mkoa Saimon Mangelepa amesema kwamba kutokana na maagizo iliyokuwa imeyatoa kwa kamati ya siasa ya wilaya ya Misungwi ambapo pia ilimwita na kumhoji mwenyekiti huyo kisha kumtaka apime uzito wa tuhuma na kujiuzuru nafasi hiyo.

Pollycarp anatuhumiwa kuhusishwa na ubadhilifu na wizi wa fedha za halmashauri ya wilaya ya Misungwi kwenye taarifa ya Mkaguzi mkuu na Hesabu CAG Ludovick Uttouh iliyozitaja Halmashauri 33 nchini ambazo zimeripotiwa kutafuna fedha kinyume cha taratibu na kanuni za kwa malengo yaliyokuwa yamekusudiwa ikiwa ni utekelezaji wa miradi ya maendeleo.

Wakati uongozi wa CCM ngazi Mkoa wa Mwanza ukichukua hatua na maamuzi hayo tayari kumekuwepo na tetesi kuwa mwenyekiti huyo amekuwa akiendesha mikakati ya chini kwa chini  kuwahamasisha baadhi ya madiwani wenzake 26 wanaomuunga mkono waendelee kujiandaa na kukihama chama hicho na kujiunga na chama kimoja cha siasa kwa madai kwamba taarifa hiyo ya CAG iligushiwa na kuchakachuliwa kwa lengo la kisiasa ikidaiwa kufanywa na kigogo mmoja wa ngazi ya kitaifa atokaye Wilayani humo.

Tupe maoni yako