BIRCHAND GROUP YATEKELEZA KWA VITENDO KAULI YA RAIS MAGUFULI KWA KUWALIPA WAKULIMA WA PAMBA.

KAMPUNI ya ununuzi wa Pamba ya Birchand Group ya jijini Mwanza, imeendelea na zoezi la kuwalipa wakulima wa zao la Pamba katika wilaya zote zinazolima pamba mkoani hapa.

Kampuni hiyo imekuwa na utaratibu wa kuwalipa wakulima wa pamba kupitia vyama vya ushirika vya Msingi AMCOS, kwa kila wiki mara mbili (Jumanne na Jumamosi).

Birchard group inaendelea kutekeleza kwa vitendo agizo la Rais DK. John Pombe Magufuli alilolitoa hivi karibu la kuzitaka kampuni za ununuzi wa pamba kuwalipa wakulima ndani ya siku 14.

Kauli ya Rais Dk. Magufuli imekuja ikiwa tayari kampuni hiyo imeishaanza kuwalipa wakulima wa zao hilo kwa wiki mara mbili ambapo mpaka sasa zoezi hilo linaendelea.

Baadhi ya wakulima walionufaika na ulipwaji wa fedha hizo, waliipongeza kampuni hiyo kwa kuwalipa wakulima kwani kampuni nyingine zilishindwa kununua pamba yao.

Mwenyekiti wa Chama Cha Ushirika Cha Msingi (AMCOS) cha  Shishani wilayani Magu, Paulo Nzinza alisema  kampuni hiyo imewasaidia kwa kiasi kikubwa na kuomba serikali kuendelea kuisaidia kwa kuikopesha fedha kama inavyoendelea kufanya hivi sasa.

Meneja wa oparesheni wa kampuni hiyo, Steven alisema ndani ya wiki iliyopita wamelipa wakulima hao kiasi cha Sh. Bilioni 1 na kwamba bado wanaendelea na zoezi hilo kwa kila wiki kulingana na fedha inavyopatikana.

Alisema kampuni hiyo pamoja na kuendelea zoezi la kuwalipa wakulima lakini kwa sasa wana mpango wa kuhakikisha wananunua pamba yote kutoka kwa wakulima wa mkoa huo.

Tupe maoni yako