HOTUBA YA ALTAF MANSOOR HIRANI (DOGO) KATIKA HARAMBEE YA KUCHANGIA UBORESHAJI NA UPANUZI WA MATANGAZO YA REDIO IQRA FM NA REDIO SAUTI YA QUR-ANI MBELE YA MGENI RASMI MHE. LOWASSA

Maelezo fupi yaliyotolewa na Mlezi Altaf Mansoor Hirani, Jumuiya ya kuendeleza Quran Na Sunnah Tanzania (JUQUSUTA), Mwanza kwenye harambee ya kuchangia uboreshaji na upanuzi wa matangazo ya Redio Iqra FM na Redio Sauti ya Qur-ani, Hoteli ya Gold Crest, Mwanza, Tanzania,

5^th Julai 2013

Bismillah-ir-Rahman-ir-Rahim

Mh. Mgeni Rasmi  Waziri Mkuu Msaafu,

Mjumbe wa Halmashauri Kuu ya CCM,

na Mbunge wa Monduli, Edward Lowassa (MB)

Kaimu Mkuu wa Mkoa, Mwanza

Sheikh wa Mkoa wa Mwanza

Waheshimiwa Masheik,

Maimamu na viongozi wote,

Waheshimiwa Waalikwa

ASALAM ALAIKUM

Bwana Yesu Asifiwe

Tumsifu Yesu Christu

Ni heshima kubwa kwangu kuwakaribisha nyote kwenye hafla yetu ya leo ya kuchangia uboreshaji na upanuzi wa matangazo ya vituo vyetu vya redio,  Iqra FM na redio Sauti ya Qur-ani.

Ninajua kuwa haikuwa rahisi kwako kukubali mwaliko wetu kutokana na shughuli zako nyingi, lakini kutokana na moyo wako wa kujali shughuli yoyote ya maendeleo, umekubali kuwa nasi leo.

Kwa kuzingatia nimekuwa nikijihusisha kwa hali na mali katika kuendeleza shughuli za kituo hiki cha Iqra FM na shughuli nyingine za kijamii, nikiwa mlezi wa JUQUSUTA taasisi inayosimamia redio hiyo, nakumbusha tarehe 5 Decemba 2012 nilikua mgeni rasmi katika shuguli ya kutafuta pesa kwa lengo la kufanikisha upanuzi wa redio Iqra na redio Sauti ya Qur-ani ni furaha kubwa kwangu kuona wewe mgeni rasmi, na wanajamii wengine wakijitokeza kusaidia kufikia lengo la kuboresha shughuli za vituo hivi.

Ninawashukuru sana, kwa ukarimu wenu.

Kazi ya kuboresha shughuli ya kituo cha redio cha Iqra FM inakadiriwa kugharimu ,  Shilingi 386,930,000 (milioni mia tatu na themanini na sita na laki mia tisa na thelathini) na redio ya Sauti ya Qur-ani shilling 250,000,000.00 (million mia mbili na hamsini).

Kazi hizi ni pamoja na kujenga minara za matangazo, kupanua vituo vya Iqra FM na Sauti ya Qur-ani, na ujenzi za studio ya kisasa.

Ninaamini Maadili ya Uislamu ndio msingi muhimu wa kila muumini wa dini ya Kiislamu katika maisha yake ya kila siku na katika shughuli yeyote aifanyayo.

Ninaamini vituo vya redio Iqra FM na redio Sauti ya Qur-ani kitaonyesha Uislamu kama dira unayohusisha mambo yahusuyo jamii. Ni cheche ya kimungu ambayo inatoa ubinafsi pia inayo waunganisha binadamu katika jamii moja. Korani inasema binadamu ameumbwa kutokana na roho moja, kama mwanaume na mwanamke, jamii na mataifa, ili watu waweze kufahamiana. Inawaleta watu wa imani zote kwenye jukwaa moja, kwa kupitia wema.

Na jioni hii, sisi sote tuko kwenye jukwaa moja kwa kupitia wema.

Vituo hivii vikiboreshwa na kupanua matangazo yake vitaweza kuwafikia wasikilizaji wengi zaidi, wakiwemo Waislamu na wanajamii wengine, na  wataweza kupata mawaidha na taarifa zitakazo wa wezesha kuwa wacha Mungu na raia wema wa nchi yao.

Vituo vya Iqra FM na Sauti ya Qur-ani vikiwa ni vituo yya Kiislamu vina wajibu mkubwa wa kujenga maadili ya Kiislamu miongoni mwa Waislamu na kujenga mahusiano mema kati ya Waislamu na wanajamii wengine.

Kuwa na mawazo mbadala ni nguvu katika jamii, na siyo udhaifu kwenye jamii. Kwa bahati nzuri majibu yote ya kiroho na kidunia tunayapata kutoka kwenye Quran Tukufu na maisha ya Mtume Mohamed.

 Kwa maana hiyo naipongeze JUQUSUTA na BAKWATA kwa kazi nzuri ya kuendeleza maadili ya kiislamu katika jamii.

 Mheshimiwa mgeni rasmi, bila shaka sote tunafahamu kuwa vyombo vya habari, hususan vituo vya redio, ni muhimu katika kuelimisha jamii, kuihabarisha na kuiburudisha.

Aidha, katika matangazo yake, itakuwa vyema vituo vya  Iqraa FM na Sauti ya Qur-ani, vitakuwa na vipindi ambavyo vinatoa mwanga kuhusu madhehebu mengine ya kidini, lakini bila kuya kashifu.

Mimi ninaamini kwamba kiongozi bora ni yule ambaye anajenga na siyo anayebomoa, Mheshimiwa mgeni rasmi, wewe kama kiongozi shupavu na makini unaendelea kujenga jamii kwa ukarimu wako kwa kuchangia kwa hali na mali ,  shule, vyuo, misikti , makanisa n.k.

 Naomba niwashukuru awali wale wote watakaokuunga mkono leo ili uweze kuviwezesha vituo hivi kufanya kazi zake.

Nawambia toweni kwa ajili ya mungu, mungu atawalipa maradufu.

Upo msemi usemao – na nina nukuu

‘(FANYA YA MUNGU – MUNGU NAE ATAFANYA YAKO’)

                                                            Mwisho wa kunukuu.

Leo, tutaraji Mungu nae kutufanyia makubwa katika maisha yetu, shuguli za kila siku na afya zetu, amen.

Mh.Mgeni Rasmi, kwa pamoja tusiache kuiombea nchi yetu Amani, Utulivu, Mshikamano Na Kuvumiliana.

Mh. Mgeni Rasmi ninahamu sana, sasa, kufaidika na fikra na busara zako ili tujenge taifa letu sote kwa pamoja.

Sala yangu ni kwamba Mungu awe nawe, akuimarishe afya yako, akupe moyo na uwezo wa kuongoza kwa hekima zaidi.

Tumuunge mkono mgeni wetu, tuchangie kwa moyo wetu na uwezo wetu, ili tupate Baraka za Mungu wote.

WABILLAHI TAUFIQ

Asanteni.

Baada ya kumalizika harambee hiyo ndipo Mwenyekiti wa Kamati ya harambee hiyo Sheikh Hassan Kabeke alitoa taarifa ya fedha zilizochangwa awali na zile zilizopatikana ambapo jumla kuu kilikuwa kiasi cha shilingi milioni 590.8 na kuelezwa kuwa kiasi hicho tayari kilikuwa kimevuka lengo lililowekwa la milioni 500 na kamati yake.

Katika harambee hiyo wachangiaji wakubwa waliojitokeza ni MNEC wa Tarime Christopher Gachuma (ml.10), MNEC wa Arumeru Mathias Manga (ml.10), Kampuni ya MOIL Mkurugenzi Altaf Mansoor ‘Dogo’(ml.10),Kampuni ya GBP (ml.15) Mbunge Ezekial Maige wa Msalala (ml.2), MNEC wa Busega Raphaer Chegeni (ml.2).

Wengine ni Mwenyekiti wa CCM Mkoa wa Shinyanga Khamis Mgeja (ml.2), Mkurugenzi wa Jiji la Mwanza Hida Hassan (ml.3), Meya wa Jiji la Mwanza Stanislaus Mabula (ml.1), Salum Mbuzi Mbuge wa zamani wa Meatu (ml.6), Mussa Muzia (B.O.T) ml.2, Barnabas Mathayo (ml.2), MNEC wa Musoma Vedastus Mathayo (ml.2) huku Lowassa akifunga dimba kwa kuchangia milioni 20 tasilimu.      

Tupe maoni yako