FULL STORI ZA LEO ATHALI ZA MVUA MKOANI MWANZA.

MVUA kubwa iliyonyesha hii leo katika jiji la Mwanza imeripotiwa kusababisha hasara mbalimbali kwa kuharibu vitu ikiwemo kubomoa nyumba ya familia hii yenye watu 11 ambao mpaka sasa haijafahamika wapi itakwenda kujisitiri.

Mali zote zimekwenda, vyakula, nguo, vyombo vya ndani na baadhi ya thamani muhimu.

Thomas Mashilingi ni mkazi wa mtaa wa Buduku Kiseke B wilayani Ilemela ambaye nyumba yake imesombwa na maji. BOFYA PLAY KUSIKILIZA.

Mwenyekiti wa mtaa huo amesema wakazi wa mtaa wake wameathirika kwa kiasi kikubwa ambapo baadhi yao wameachwa bila makazi. BOFYA PLAY KUSIKILIZA.

Hili ni shamba la mpunga ambalo kwa sasa limegeuka kuwa jangwa mara baada ya mbegu zilizokuwa zimemea na kuchomoza kusombwa na maji kufuatia mafuriko.

Wakati huo huo Mamlaka ya Hali ya Hewa nchini (TMA), imewatahadharisha wananchi kuwa mvua kubwa za El-Nino zinatarajiwa kunyesha mwezi huu na Desemba, katika mikoa ya Kanda ya Ziwa, Kanda ya Magharibi na Nyanda za Juu Kaskazini mashariki.

TMA imesema mvua hizo zinakuja kutokana na mifumo ya hali ya hewa kuzidi kuonyesha hali hiyo.

Mamlaka hiyo imewataka wakulima, wafugaji, mamlaka za wanyamapori, mamlaka za maji na afya kufuata ushauri wa wataalamu wa sekta husika ili kutekeleza mipango isiyoweza kuathiriwa na mwelekeo wa hali ya hewa ya msimu wa mvua za vuli.

Kaimu Mkurugenzi Mkuu wa TMA, Dk Ladislaus Chang’a alisema jana katika taarifa kuwa maeneo yanayopata mvua mara moja kwa mwaka ya Dodoma, Singinda, Ruvuma, Lindi, Mtwara, Songea, Mbeya, Iringa, Njombe, Tabora, Kigoma Rukwa na Katavi zinatarajiwa kuanza kati ya wiki ya pili na ya nne ya mwezi huu.

Mvua za El-Nino zinatokana na kuendelea kuongezeka kwa joto katika maeneo ya Bahari ya Pacific na kusababisha mifumo mingine ya hali ya hewa kuvurugika.

Chang’a alisema mabadiliko hayo yamesababisha mwitikio wa mfumo wa hali ya hewa katika Bahari ya Hindi kuwa na mchango hasi, kinyume na ilivyotarajiwa katika mwenendo wa mvua za vuli nchini kwenye kipindi Oktoba na kusababisha vipindi virefu vya upungufu wa mvua katika mikoa ya Morogoro, Pwani na Dar es Salaam.

Wakati TMA ikitoa taarifa hiyo, tayari mvua imeanza kunyesha kwa kasi ikiwa na upepo mkali katika mikoa ya Mwanza na Mbeya na kukwamisha baadhi ya shughuli za jamii katika sehemu hizo.

Kutoka jijini Mwanza, mvua kubwa iliyonyesha kuanzia alfajiri ilisababisha kufungwa kwa Uwanja wa Ndege na mwanafunzi mmoja kusombwa na maji.

Kutokana na mvua hizo, usafiri wa kuingia na kutoka katikati ya jiji hilo ulikuwa wa shida na kusababisha wafanyakazi wengi kuingia ofisini kuanzia saa 4:00 asubuhi kutokana na foleni kubwa za magari zilizokuwa barabarani.

Maeneo ya Mabatini na Kirumba ambayo hukumbwa na mafuriko mara kwa mara yalijaa maji na kusababisha watu kulazimika kuyachota ndani na kumwaga nje.

Mkazi wa Mabatini, Ronaida Mtatina alisema vitu vyake vilivyokuwa kwenye kibanda cha biashara vilisombwa na maji na vingine kulowana.

Mbali na hasara hizo mtu mmoja ameonekana akisombwa na maji kamaambavyo mwenzetu Mustapha Ramadhani alivyofanya mahojiano na shuhuda wa tukio hilo. BOFYA PLAY KUMSIKILIZA.

Kamanda wa Polisi Mkoa wa Mwanza, Charles Mkumbo alisema mwanafunzi wa Shule ya Sekondari ya Nyamanoro, Zainab Shaaban (18) alisombwa na maji eneo la Nyamanoro wakati akivuka kwenda shuleni, lakini haijathibitika kama alifariki au la.

Meneja wa Uwanja wa Ndege wa Mwanza, Ester Madale alisema kutokana na mvua hiyo ulijaa maji na ilipotimu saa 3:00 asubuhi walilazimika kusitisha huduma za kutua na kuruka kwa ndege hadi saa 8:00 mchana. BOFYA PLAY KUSIKILIZA.

Hali ya eneo la kutua ndege uwanja wa ndege Mwanza.

Hali ya eneo la kutua ndege uwanja wa ndege Mwanza.

Tupe maoni yako