MWANAMKE AKATWA MKONO MARA BAADA YA KUHOJI HATMA YA MAZAO YALIYOUZWA NA MUMEWE.

 Mtandao wa kupinga Ukatili wa kijinsia (MKUKI) kanda ya ziwa leo unazindua harakati za siku 16 za kupinga Ukatili wa kijinsia Kanda ya ziwa, Shughuli ikifanyika katika viwanja vya Mabatini kuanzia saa 3:00 asubuhi hadi saa 10:00 jioni, ambapo mgeni rasmi katika uzinduzi huu ni Kamishna msaidizai wa Jeshi la Polisi Mkoa wa Mwanza, DCP Ernest Mangu.

Mwenyekiti wa Kamati ya Maandalizi ya Siku 16 za harakati za Kupinga ukatili wa kijinsia Kanda ya Ziwa Bi. Leah Sotel amewaomba wananchi wote wa maeneo mbalimbali kanda ya Ziwa hususani Mkoa wa Mwanza, kujitokeza kwa wingi leo (JUMATATU) katika viwanja vya wazi vya Polisi Mabatini ili kufanikisha uzinduzi huu na kupata uelewa wa pamoja, kuhusua masuala mbalimbali ya haki za binadamu na msaada wa kisheria.

Pamoja na Uzinduzi huu, kuna matukio mengi makubwa yatakayofanyika kama vile mdahalo utakao wahusisha wanavyuo wa kike ukirushwa moja kwa moja kupitia Barmedas TV siku ya katarehe 27/11/2013, katika Chuo cha Mtakatifu Agustino Nyegezi Malimbe kuanzia saa 3:00 asubuhi hadi saa 10:300 jioni.

Wanahabari kwanye kusanyiko la maandalizi.

Siku 16 za harakati dhidi ya ukatili wa kijinsia ni kampeni ya Kimataifa iliyoanzishwa na taasisi ya Kimataifa ya wanawake katika uongozi 'Womens Global Leadership Institute', iliyoanzishwa mwaka 1991 nchini Marekani kwa nia ya kuamsha Ari ya kuzuia na kupambana na Ukatili dhidi ya wanawake, kwa kuzingatia haja ya kuleta usawa wa kijinsia.

Kampeni hii ilianzishwa ikiwa ni matokeo ya mauaji ya wanawake yaliyotokea 1960 Mirabele Nchini Dominica, wanawake hao waliuawa wakiwa katika harakati za kupinga utawala wa kidikteta wa Rais wa nchi hiyo Ndugu Raphael Trujilo na kuhitimisha tarehe 10 Desemba ambayo ni siku ya kimataifa ya tamko la haki za kibinadamu, ikiwa ni ishara ya kuhusisha ukatili dhidi ya wanawake na haki za binadamu, kwani ukatili huu ni uvunjaji wa haki za binadamu.

Kwa kuona hivyo, MKUKI KANDA YA ZIWA wameamua kutumia fursa hiyo ya siku 16 za kupinga ukatili wa kijinsia, kupinga vitendo hivyo na kuhamasisha jamii kuchukua hatua pindi inapoona au kuhisi uwezekano wa kutokea kwa vitendo vya ukatili ikiwa ni pamoja na kutoa taarifa ya vitendo vya ukatili kwa taasisi za kiserikali, taasisi za kiraia, jeshi la polisi na wnafamilia wengine wa karibu.

Bi. Khadija Liganga ambaye ni Ofisa Sera na Utetezi akifafanua jambo.

Kumekuwa na matukio mengi ya Ukatili Kanda ya Ziwa ikiwemo mauaji ya kikatili dhidi ya wanawake kwa imani za kishirikina, mfano kuongeza kipato haswa kwa wavuvi na wachimbaji madini mkoani Mara, ambapo matukio takribani 14 yameripotiwa na idadi ya wanawake 14 wamefikwa na mauti kwa kukatwa vichwa na kutolewa sehemu za siri (memory card).

Aina mpya ya ukatili wa kijinsia maarufu kama 'Memory card' unahusisha wanawake kuuawa na kunyofolewa sehemu za siri na umekuwa ukiripotiwa kufanywa na kundi la watu lililojiita Makhirikhiri na kuzua hofu kwa wakazi wa wilaya ya Butiama mkoani Mara.

Tukio lingine ambalo limebaki kuwa simanzi na kuwekwa katika historia ya matukio mabaya kutokea ni lile lililo msababishia ulemavu mwanamke mmoja huko mkoani Geita ambaye aliripotiwa kujeruhiwa kwa kukatwa mkono baada ya kuwepo kwa malumbano ya muda juu ya mazao yaliyopatikana shambani na kuuzwa na mume bila kumshirikisha mkewe huyo na baadaye mwanamke huyo kukatwa mkono na mumewe baada ya kuhoji.

Hii ndiyo Kamati ya Maandalizi ya Siku 16 za harakati za Kupinga ukatili wa kijinsia Kanda ya Ziwa. 

Tupe maoni yako