MBUNGE WA KWIMBA AIKWAA TENA NAFASI YA UCHUMI CCM MWANZA

Mbunge wa Jimbo la Kwimba Shanif Hirani Mansoor akizungumza mara baada ya kutangazwa mshindi.

Na Peter Fabian                                     

MWANZA.

HALMASHAURI Kuu ya CCM Mkoa wa Mwanza imefanya uchaguzi na kumchagua Mbunge wa Jimbo la Kwimba Shanif Hirani Mansoor alimaarufu ‘MOIL’ kuwa Katibu wa Uchumi na Fedha Mkoa huo kwa mara nyingine tena.

Mbunge Mansoor amafanikiwa kutetea nafasi hiyo kwa kumshinda Mjumbe wa Halmashauri Kuu ya CCM Taifa (NEC) Wilaya ya Ilemela Israel Mtambalike baada ya kurudiwa uchaguzi huo jana kufatia kuahirishwa mara ya kwanza wakati ulipofanyika uchaguzi ngazi ya Mkoa kuwapata viongozi wake kutokana na siku hiyo kuingia giza na wajumbe kuomba kuahirishwa kumpata mtu katika nafasi hiyo.

Uchaguzi huo uliofanyika katika ukumbi wa ndani wa uwanja wa CCM Kirumba na kuhudhuliwa na viongozi waandamizi wa Mkoa ambao ni Mwenyekiti Anthon Dialo na Katibu Joyce Masunga, Mkuu wa Mkoa Mhandisi Evarist Ndikilo ,Wakuu wa Wilaya Angelina Mabula (Butiama) na Costantine Kanyansu (Ngara) wajumbe wa NEC wa Wilaya zote na Makada mbalimbali wakiwemo Wabunge Richard Ndassa (Sumve) na Shanif Mansoor (Kwimba).

Mwenyekiti wa CCM Mkoa wa Mwanza Dialo awali akifungua kikao hicho alisema kutakuwa na ajenda tano ikiwemo ya kufungua kikao na ile ya uchaguzi huku zingine zikiwa za kawaida za kujadili mambo muhimu, kujaza nafasi ambayo awali uchaguzi waOctoba 2012 uliahirishwa na ulipofanyika mwezi Faberuari 2013 wagombea walifungana kwa kupata kura 32 kila mmoja na hivyo kutopatikana mshindi na kupangwa kurudiwa tena mei 5 mwaka huu.

“Wajumbe tufanye uchaguzi wa Katibu wa Uchumi na Fedha ili kukamilisha safu ya uongozi ngazi hii ya Mkoa na tutumie busara na tuache kufanya kwa shinikizo la mtu kwani wagombea ni wawili tu watajieleza kwenu na mtawachagua kwa kuwapigia kura za siri ili kumpata atakayeshinda”alisisitiza Dialo.

Ni mara baada ya kutangazwa matokeo.

Akitangaza matokeo ya uchaguzi huo Mwenyekiti Dialo alisema kwamba wajumbe halali waliohudhulia kikao hicho walikuwa 68 kati ya wajumbe 80 waliotakiwa kuhudhulia hivyo uchaguzi ni halali kwa mujibu wa Katiba ya chama hicho,baada ya kupigwa kura Mbunge Mansoor amejipatia kura 44 na Mjumbe wa NEC Mtambalike amepata kura 24 na hakuna kura iliyoharibika.

“Safu ya uongozi ngazi ya Mkoa imekamilika sasa hivyo ndugu wajumbe niwapongeze kwa uamuzi wenu mzuri wa kumuamini tena Mchumi wetu kuendelea kushika nafasi hiyo na kwa kuzingatia changamoto zilizopo ndani ya chama na taifa kwa ujumla tumejipanga kutekeleza majukumu yetu ya uongozi na tunachohitaji kutoka kwenu ni ushirikiano wa dhati ili kuhakikisha CCM inashinda kwa kishindo 2014 serikali za mitaa na 2015 uchaguzi mkuu”alisema Dialo na kushangiliwa na wajumbe wote.

Akizungumza na waandishi wa Habari baada ya kumalizika kwa kikao hicho Katibu wa Mchumi na Fedha Mkoa  Mbunge Mansoor alisema kwamba amekuwa ni mtu wa kujitolea kwa kukisaidia chama hicho kwa hali na mali na wajumbe wameona bado amafaa kuendelea kukitumikia chama kwa miaka mingine mitano kutokana na kufanya kazi zake kwa uadilifu mkubwa.

“Wajumbe wamenipa kura za kutosha hivyo nawapongeza nawaahidi kwenye shughuli zangu za Uchumi sitowaangusha na ntahakikisha naboresha vyanzo vya mapato na naomba tushirikiane wanachama wote na viongozi kwa pamoja kukiimalisha chama chetu huku pia tutajitahidi kupeleka fedha kwenye ngazi za wilaya ili wanachama wetu ngazi ya Kata, Matawi na Mashina waweze kupata posho za kutekeleza majukumu yao” alisema

Aliongeza kuwa kwa kushirikiana na wajumbe wote wa Kamati ya Siasa Mkoa na Wilaya zake atahakisha mapungufu yaliyojitokeza kwenye vyanzo vya mapato wanarekebishwa haraka  na kuweka mikakati mizuri ambayo itasaidia chama kupata fedha na kuendelea kutekeleza majukumu yake bila kuteteleka kutokana na Chama Makao Makuu kuutaka Mkoa kujitegemea na kupeleka ruzuku Wilaya zote za Mkoa huo.

Zaidi msikilize kupitia video hii hapa chini:-

Tupe maoni yako