WALIOFARIKI KWENYE MAPOROMOKO YA UDONGO NCHINI SIERRA LEONE HUENDA WAKAFIKIA 500

Huku karibu viwiliwili 400 vikiwa vimepatikana hadi sasa kwenye maporomoko ya udongo yaliyoambatana na mafuriko yaliyotokea siku ya Jumatatu asubuhi katika mji wa Regent nchini Sierra Leone, mamlaka husika za nchi hiyo zimetangaza kuwa huenda idadi ya waliofariki ikafikia 500 huku mamia ya watu wengine wakiwa hawajulikani waliko.
 

Wakati shughuli za uokozi zikiwa zingali zinaendelea, mkuu wa shughuli hizo Seneh Dumbuya amesema wanakabiliwa na uhaba wa sehemu za kuhifadhia maiti.

 Mkuu wa Mochari Owiz Koroma amesema wanajaribu kuharakisha kazi za kuhesabu, kutenganisha na kuzifanyia uchunguzi maiti na kutoa vibali vya vifo kabla ya shughuli za mazishi.

Ili kupunguza mbinyo unaozikabili sehemu za kuhifadhia maiti, mamlaka husika na mashirika ya misaada yanaandaa kufanya shughuli za mazishi kwenye mava nne tofauti katika mji mkuu wa Sierra Leone, Freetown.

Kwa mujibu wa msemaji wa serikali Cornelius Deveaux mazishi ya watu waliofariki kwenye janga hilo la maumbile ambalo limetajwa kuwa kubwa zaidi kuwahi kulikumba bara la Afrika katika miaka ya hivi karibuni yatafanyika kesho Alkhamisi. 

Shughuli za uokozi zikiwa zinaendele.

Wakati huohuo msemaji wa Shirika la Msalaba Mwekeundu nchini Sierra Leone Abu Bakarr Tarawallie amesema watu wasiopungua 3,000 wamebaki bila makaazi na wanahitajia hifadhi, misaada ya tiba na chakula. Kwa mujibu wa shirika hilo hadi sasa watu wengine 600 hawajulikani waliko.

Rais Ernest Bai Koroma wa Sierra Leone ameomba misaada ya kimataifa kwa ajili ya wahanga wa maafa ya maporomoko ya udongo sambamba na kutoa wito kwa wakazi wa mji wa Regent na wa maeneo mengine yaliyoathiriwa na mafuriko kuhama haraka iwezekakanvyo ili kutoa fursa kwa jeshi na wafanyakazi wengine wa huduma za uokoaji kuendelea kutafuta manusura ambao huenda wakawa wamefunikwa chini ya udongo

Tupe maoni yako