BOB HAISA AJA NA SAFARI YA UTALII.

BAADA ya kimya kirefu katika fani hatimaye yule mkali wa masongi ya Kimahaba (slows jams), Miduara, Ragga pamoja na Bongo fleva mbalimbali zenye mahadhi na mirindimo ya Kiafrika Bob Haisa, hatimaye amerejea kunako gemu akiachia track yake ya kwanza inayo hamasisha suala la utalii.

Bob Haisa aliyewahi tamba nchini Tanzania na kuvuma Afrika Mashariki na ngoma kama Nipe Mgongo, Shipanda Wachile, Nisamehe, Chagua Mwenyewe, Afrika Lobango na nyingine nyingi amesema kuwa kimya chake kilikuwa na sababu za kimsingi akiwa na lengo la kuja na mipini mikali zaidi itakayo mnufaisha kibiashara hasa ukizingatia kuwa muziki katika miaka ya sasa ni biashara hivyo ameamua kuzigusa sekta zote muhimu kulingana na mahitaji yake.

Anasema kuwa kufyatua songi hilo linalo kwenda kwa jina la 'SAFARI YA UTALII' kumekuja ikiwa ni dhahiri kuitikia wito wa Serikali na Bodi yake ya Utalii kwamba kila mzalendo ana jukumu la kuhakikisha utalii wa Taifa la Tanzania unasonga mbele, naye hajasita kuitumia fursa na haki yake hiyo ya msingi kwa kutumia rasilimali zake (kipaji alichonacho) kukuza utalii wa Taifa.

Ameongeza kuwa ameshuhudia juhudi za Taifa katika kuutangaza utalii na vivutio vyake ambavyo ni adimu kupatikana kwingineko duniani kupitia mabango ya viwanja vya Ligi ya soka la Uingereza na kupitia watu mbalimbali maarufu duniani nao waka zuru vivutio hivyo wakifaidi maadhari safi.

Amechagiza kuwa utalii si kwa wageni tu bali pia ni kwa wananchi wenye nchi kufaidi vilivyo vyao kwa kufanya utalii hivyo amehamasika na mpango huo naye ameamua kuzama kupitia fani na kuwa amsha wananchi kufanya utalii wa ndani.

"Kwanza kabisa nawakubali TANAPA" Alisema na kisha kuongeza "Kiukweli sijalipwa kufanya kazi hii. Kwa sababu mie ni mkongwe katika fani nilikaa chini nikafanya tathimini na kuandika nilivyo vifanyia tathimini kuhusu utalii. Najua hata wadau wenyewe wakisikiliza watakubali na nimewapa ruksa kuutumia wimbo huu kwenye shughuli zote za utalii kwani najua ni kwa manufaa ya nchi yangu" Alimaliza Bob Haisa.
By. G.Sengo.

Tupe maoni yako